Baydhowy( Raathiyow Arlaathi)Da’yarka garabka midig ee kooxda Arsenal ee Bukayo Saka ayaa ka hadlay rigoorihii muhiimka ahaa ee uu kooxdiisa ka lumiyay kulankii ay shalay barbardhaca 2-2 ah lasoo galeen West Ham United.
Kahor dhammaadka qaybtii hore ayuu Said Benrahma rigoore u dhaliyay kooxda martida loo ahaa balse bilawgii qaybtii dambe ayuu Bukayo lumiyay rigoore uu kulanka 3-1 kaga dhigi karayay taas oo West Ham ka caawisay in 2 daqiiqo kaddiba uu Jarrod Bowen goolka barbardhaca keeno.
Kulankaas ayaa muhiim u noqon kara xilli ciyaareedka Arsenal isagoo ku sababi kara inay horyaalka ay mudada dheer soo hoggaaminayeen u waayaan kooxda cadaadiska ku haysa ee Manchester City.
Arsenal ayaa toddobaadka dambe Southampton la ciyaari doonta xilli ay City ku mashquulayso FA Cup kahor inta aysan 26-ka bishan booqanin Etihad Stadium oo labada kooxood isku gali doonaan.