Baydhowy( Raathiyow Arlaathi)Warbixinno ayaa daaha ka qaaday in Pep Guardiola, tababaraha Manchester City, uu si shaqsi ah u hoggaaminayo dadaal cusub oo lagu doonayo saxiixa daafaca bidix ee Barcelona, Alejandro Balde, isla markaana uu durba kala hadlay suurtagalnimada heshiiska agaasimaha ciyaaraha ee Barca, Deco.
Manchester City ayaa isku dayday inay Balde la saxiixato xagaagii 2023, iyadoo ka faa’iideysanaysa xaaladdii dhaqaale ee liidatay ee Barcelona markaas ku jirtay. Si kastaba ha ahaatee, Deco ayaa diiday dalabkaas wuxuuna ku guuleystay inuu cusboonaysiiyo qandaraas muddo dheer ah, taasoo xirtay albaabkii ay City uga faa’iideysan lahayd.
Wararka ayaa sheegaya in inkasta oo xaaladda dhaqaale ee Barcelona ay hadda deggan tahay isla markaana Balde uu noqday xiddig muhiim u ah kooxda, haddana Guardiola uu weli ku adkeysanayo inuu doonayo saxiixa daafacaas, maadaama uu aaminsan yahay in Balde uu leeyahay tayo iyo qaab ciyaareed si buuxda ugu habboon nidaamka Manchester City.
Inkasta oo ay adag tahay in heshiiskan la dhameeyo waqtigan, xiisaha uu Guardiola u qabo ciyaaryahanka ayaa muujinaya qadarin weyn oo uu u hayo kartidiisa iyo rabitaankiisa ah inuu mustaqbalka ku daro qorshihiisa farsamo.
