Baydhowy( Raathiyow Arlaathi)Kooxda Arsenal ayaa la sheegay inay xiiseyneyso saxiixa garabka weerarka Real Madrid Rodrygo, iyadoo tababare Mikel Arteta uu tixgeliyay in lagu beddelo daafaca reer France ee William Saliba, oo ah ciyaaryahan Madrid ay muddo dheer daneynaysay, sida uu sheegay Defensa Central.
Si kastaba ha ahaatee, madaxweynaha Real Madrid Florentino Perez ayaa gebi ahaanba diiday qorshahan, maadaama kooxda reer Spain ay aaminsan tahay in Rodrygo uu leeyahay qiimo suuqa ka sarreeya Saliba. Waxaa sidoo kale la tixgelinayaa xaaladda qandaraaska Saliba, oo dhacaya sanadka 2026, taasoo ka dhigan in qiimihiisu hoos u dhici karo haddii uusan heshiis cusub saxiixin.
Dhanka kale, Rodrygo ayaa qandaraas kula jira Madrid ilaa Juunyo 2028, laakiin waxaa suurtagal ah inuu ka tago kooxda dhammaadka xilli ciyaareedkan haddii uu dareemo raaxo-darro ama inuusan door muhiim ah ku lahayn Madrid. Ilaa hadda, ciyaaryahanka reer Brazil ma muujin doonis cad oo uu kaga tagayo kooxda.
Rodrygo ayaa dhawaan tababar u galay si gooni ah, mana ka qeyb gali doono kulanka xiga ee Madrid ay la ciyaareyso Sevilla. Waxaana shaki laga qabaa inuu ka muuqdo kulanka ugu dambeeya ee La Liga ee ka dhacaya Santiago Bernabeu.
Real Madrid ayaa weli kalsooni buuxda ku qabta kartida Rodrygo, waxaana ay rumeysan yihiin inuu noqon karo mid ka mid ah ciyaartoyda ugu fiican dunida. Hase yeeshee, joogtayn la’aanta iyo tartanka adag ee ka dhex jira kooxda – gaar ahaan Vinicius, Bellingham, iyo Mbappe – ayaa hoos u dhigtay saameyntiisa. Tani waxay suurtagal ka dhigi kartaa in Rodrygo uu xiiseeyo koox uu hoggaan ka noqdo.
Qiimaha lagu heli karo Rodrygo ayaa lagu qiyaasayaa inta u dhaxaysa €80m ilaa €100m, iyadoo kooxaha sida PSG iyo kooxo badan oo Premier League ah ay si dhow ula socdaan xaaladdiisa.
Waxaa suurtagal ah in suuqa kala iibsiga xagaaga la arko dhaqdhaqaaqyo badan oo la xiriira mustaqbalka Rodrygo.
