Baydhowy (Raathiyow Arlaathi)Taageerayaasha Manchester City ayaa warqad furan u qoray tababaraha kooxda, Pep Guardiola, iyaga oo ka codsanaya “hal faa’iido kale” oo uu sameeyo — taasoo ku saabsan helitaanka tigidhada xilli ciyaareedka iyo qiimaha maalinta ciyaarta.
Taageerayaasha City ayaa xilliyo guulo taariikhi ah ku raaxeystay intii uu Guardiola hoggaaminayay kooxda. Waxay ku guuleysteen saddexley (Treble), afar horyaal oo isku xiga Premier League ah, iyo lix horyaal guud ahaan 8 sano gudahood.
Kooxda ayaa haatan ku jirta qorshe ay ku ballaarinayso garoonkeeda Etihad Stadium, sidoo kalena waxay mar kale gaartay finalka FA Cup. Si kastaba, su’aalo ayaa laga keenay qiimaha la saarayo taageerayaasha daacadda ah. Sidaas darteed, Guardiola ayaa laga codsanayaa inuu la hadlo maamulka sare ee kooxda si dib loogu eego helitaanka tigidhada xilli ciyaareedka iyo qiimaha tigidhada maalinta ciyaarta – si loo ilaaliyo taageerayaasha dhabta ah isla markaana loogu sahlo jiilka cusub inay ciyaaraha yimaadaan.
Warqadda oo ka timid kooxaha taageerayaasha sida 1894, MCFC Food Bank Support, Solid Citizens, iyo Trade Union Blues ayaa u qorneyd sidan:
“Pep, hambalyo ku saabsan in aad nagu hoggaamisay final kale oo Wembley ah. Ka hor ciyaartii Forest waxaad sheegtay inaad fahamsan tahay in taageerayaashu ay la tacaalayaan cadaadis dhaqaale. Waxaan ku faraxsanahay inaad arrintaas qirtay, sidoo kalena aad tiri waxaan doorbidayaa taageerayaal firfircoon halkii ay ka ahaan lahaayeen kuwo aamusan.”
“Marka arrintaas la eego, waxaan kaa codsaneynaa hal faa’iido kale. Asxaabtaada kooxda wax badan oo wanaagsan bay qabteen. Ma waxaad ka codsan kartaa inay sameeyaan hal wax wanaagsan oo kale? Ma la hadli kartaa saaxiibkaaga dhow ee kooxda, CEO Ferran Soriano?”
“Garoonka waxa uu korodhsanayaa 8,000 kursi xilli ciyaareedka soo socda, taageerayaashuna waxay rabaan in la soo celiyo tigidhada xilli ciyaareedka dhabtaa si xidhiidhka jiilasha loo ilaaliyo. Tirada dadka haysta tigidhada xilli ciyaareedka ayaa hoos u dhacay. Marka taageerayaashu aadi waayaan ciyaarta, kooxda ma iibin karto tigidhadaas sababtoo ah qiimahoodu waa mid aad u sarreeyaa.”
“Waxaan rabnaa isla waxaad rabto. Koox awood leh, iyo garoon buuxa oo leh jawi dhawaq leh. Dib-u-dhiska North Stand waa fursad arrintaas lagu xaqiijin karo. Laakiin, ma heli doontid jawigii aad rabtay haddii kooxda aysan dib uga fiirsan qorshahooda.”
