Baydhowy (Raathiyow Arlaathi) Halyeyga kooxda Manchester United ee Roy Keane ayaa muujiyay sida uu u arko in tababaraha cusub ee kooxda Ruben Amorim aanu xili ciyaareedkan wax mucjiso ah ka samayn doonin horyaalka Ingiriiska.
Hadalka Kane ayaa yimid ka dib markii ay United bar-baro 1-1 la gashay kooxda Ipswich Town, kulan ka tirsan Premier League.
Kane ayaa aaminsan in Amorim uusan Kooxda Man United ku hogaamin doonin kaalinta 4-aad ee kala saraynta premier League xilli ciyaareedkan.
Manchester United ayaa haatan ku jirta kaalinta 12-aad ee kala saraynta horyaalka premier League iyada oo leh 16 dhibcood, waxayna 15 dhibcood ka hoosaysaa kooxda hogaanka haysa ee Liverpool, waxayna 6 dhibcood ka hoosaysaa Arsenal oo kaalinta afraad ku jirta.
Kane ayaa yiri”Waa inaad fursad siisaa Ruben Amorim.”
Waxa uu intaa ku daray: “Miyaan aaminsanahay in kooxdu ay leedahay tayada lagama maarmaanka ah si ay ugu dhamaystaan 4-ta boos ee ugu sareeya premier League?”.
“Ma jirto wax caddaynaya awooddaas arrimuhu waa kuwo dhib badan haatan waxana jirta dhibaatooyin”.